·
煲仔飯之選
坤記煲仔小菜
咁多年嚟都沿用炭燒煲仔飯出晒名，飯香粒粒分明兼飯焦香口，自家製豉油更加係天作之合。唔只吸引遊客慕名而來打卡，識食嘅就算搭車揸車都會跨區過嚟，而煲仔飯款式都有幾廿種揀，臘腸雙腸搭排骨搭雞固然係至多人點，但窩蛋牛肉都唔好錯過，配埋臘味一齊食，食過唔記得自己減緊肥。
順帶一提，呢度嘅小菜都幾出色，夠鑊氣，嗌兩個配煲仔飯唔錯㗎！
地址：西營盤皇后大道西263號和益大廈地下1號
查詢： 2803 7209
永合成馳名煲仔飯
用麵包爐整煲仔飯馳名到海外，幾十年老字號咁有名氣，所以經常做到晏晝3、4點左右就售罄關門，想食要襯早之外，外賣亦係考慮之選，另加$30按金可以原煲上。小編同大眾一樣最愛窩蛋牛肉，但係芽菜火腩都幾惹味，下次去可以試試。
地址：西環石塘咀德輔道西360號地舖
查詢：2850 5723
腸粉之選
合益泰小食
有米芝蓮加持，當然唔會浪得虛名，就算身處深水埗都難掩星級光芒，而且價錢亦相當平民化，十幾廿蚊有找，豬腸粉有星級推薦當然係必食之選，小編個人就喜愛腸粉多麻醬配燒賣搭埋豬皮蘿蔔一齊食。
雖然舖頭設有堂食，不過唔少人都好率性，嗌完攞埋一邊就食，或者食豬腸粉企喺街用竹籤篤住食先有港式風味。
地址 ：深水埗桂林街121號地舖
查詢：2720 0239
明記腸粉
講咗先，呢間上水老店舖做埋4月9日就結業，搬走咗專登搭車返嚟食又好，嚟潮聖打卡都好，為排隊而排隊點都好，要食就要Plan吓喇！唔好再等人關門先至出Post打兩句「可惜」喎！
呢度嘅豬腸粉當然係必食，自助混醬形式值得一讚俾Like，什麼多豉油多麻醬少甜醬自己嚟啦，唔夠飽嘅可以嗌多碗粥配嚟食。
地址：上水新康街11號地下
文：小編
圖片來源：Google
